इन्डोनेसियामा ७.७ म्याग्निच्युडको भूकम्प, ३८ जनाको मृत्यु

काठमाडौँ - इन्डोनेसियाको फ्लोरेस टापुलाई केन्द्रविन्दु बनाएर शनिबार बिहान गएको शक्तिशाली ७.७ म्याग्निच्युडको भूकम्पमा कम्तीमा ३८ जनाको मृत्यु भएको छ ।

इन्डोनेसियाको राष्ट्रिय विपद् व्यवस्थापन निकाय (बीएनपीबी) ले  खोज तथा उद्धार कार्य जारी रहेको र मृतक संख्या बढ्न सक्ने जनाएको छ ।  घटनामा ठूलो संख्यामा मानिसहरु घाइते रहेको बीएनपीबीले जनाएको छ । शक्तिशाली भूकम्प र त्यसपछिका दर्जनौं परकम्पका कारण यस क्षेत्रका थुप्रै भवन तथा संरचनामा ठूलो क्षति पुगेको छ ।

स्थानीय समयअनुसार शनिबार बिहान करिब ५ बजे गएको भूकम्पको गहिराइ १५ किलोमिटर रहेको इन्डोनेसियाको मौसम विज्ञान तथा जियो फिजिक्स एजेन्सीले जनाएको छ । भूकम्पपछि केही समयका लागि सुनामीको चेतावनीसमेत जारी गरिएको थियो ।